रामचन्द्र तिम्सिना (आवाज)

उमेर ढ्ल्किएर होकि

जवानी खस्किएर हो

सुर्य टाढिएर होकि

ताकत सकिएर हो।

पोहोरको भन्दा यसपालिको जाडो धेरै ।

पुर्वबाट उदाउँने सुर्य उत्तरबाट पो उदाउँन थालेछ कि ?

सुर्यको तेजिलो राप हिमालको सिरेटोले पो सेलायो कि ?

खै किन हो कुन्नी पोहोरको भन्दा यसपालिको जाडो धेरै ।

बाख्रोले खान्छ भन्थे जाडो खान छाडेछ

आगोले ज्यान तात्छ भन्थे तात्न छाडेछ

घोत्लिएर सोच्छु उत्पादन धेरै हुने लोभमा

लोकल बाख्रो मासेर बोयर पालियो

दाउरो फालेर ग्याँस बालियो के तात्थ्यो र ?

साच्चै भन्दैछु पोहोरको भन्दा यसपालिको जाडो धेरै ।

सिरक पुरानो भएर पो होकि ?

डसना मैलो भएर पो होकि ?

छोरोले साउदिबाट ल्याईदिएको कम्बल नतातेर पो होकि ?

मनमनै प्रश्न गर्छु आधुनिकताको नाममा खरको छानो मासेर

टिनको छाना खिचडिको मानो मासेर

तयारी खाना सुविधाको बहानामा

आधुनिकताले जकडिए र ऊ होकि ?

साच्चै हो पोहोरको भन्दा यसपालिको जाडो धेरै ।

हिटर बालियो तापियो गिजर खोलियो नुहाईयो

बिदेशी नयाँ ज्याकेट पनि लगाईयो

बिदेशी नयाँ सिलप्याक पनि खाईयो

खै ज्यान त तातेन किन हो ?

खिस्स मुस्कुराउँछु थांग्नामा जन्मेको,

झोलुङ्गोमा सुतेको,

आंगनामा खेलेर झुपडीमा हुर्किएको मान्छे म

कंक्रीटको छानोमा के तात्थ्यो र ?

साच्चै हो पोहोरको भन्दा यसपालिको जाडो धेरै । यसपालिको जाडो धेरै ।